PROKURORLUĞA İŞƏ QƏBUL QAYDALARI

Azərbaycan Respublikası Prezidentinin 19 iyun 2001-ci il tarixli 509 nömrəli Fərmanı ilə təsdiq edilmiş “Prokurorluğa işə qəbul olunmaq üçün namizədlərlə müsabiqə keçirilməsi qaydaları haqqında” Əsasnaməyə əsasən 2002-ci ildən etibarən prokurorluq orqanlarına işə qəbul prosesi sistemli, şəffaf və beynəlxalq standartlara uyğun şəkildə həyata keçirilir. Hazırkı dövrədək keçirilmiş 26 müsabiqə nəticəsində prokurorluğa qulluğa qəbul olunmuş namizədlər bu gün Azərbaycan Respublikasının prokurorluq orqanlarında çalışan işçilərin 93,2 faizini təşkil edir. Bu fakt müsabiqə mexanizminin uğurlu tətbiqinin və şəffaf insan resursları siyasətinin bariz göstəricisidir.

Əlavə olaraq qeyd edilməlidir ki, müsabiqə yolu ilə qulluğa qəbul edilmiş şəxslərin əhəmiyyətli hissəsi sonradan yuxarı təsnifat vəzifələrə irəli çəkilmiş, bir çoxu isə hazırda rəhbər vəzifələrdə fəaliyyət göstərir. Bu göstəricilər prokurorluqda peşəkar kadrların dəyərləndirildiyini və yüksəldiyini təsdiqləyir, bu isə bizə sual verməyə əsas verir: görəsən, kimlər prokurorluqda işləyə bilər və bu proses necə baş tutur? Gəlin cavablayaq.

Kimlər prokurorluqda işə qəbul ola bilər?

Namizədin prokurorluqda işə qəbul olunması üçün aşağıdakı əsas şərtlərə cavab verməsi tələb olunur:

• Azərbaycan Respublikasının vətəndaşı olmaq;

• hüquqşünas ixtisasına malik olmaq;

• qanunvericilikdə nəzərdə tutulmuş yaş (Prokurorluğa işə bir qayda olaraq 30 yaşınadək şəxslər qəbul olunurlar) və sağlamlıq şərtlərinə cavab vermək;

  
  

Kimlər prokurorluqda işə qəbul edilmirlər?

· ikili vətəndaşlığı olan şəxslər;

· digər dövlətlər qarşısında öhdəlikləri olanlar;

· din xadimləri;

· fəaliyyət qabiliyyətsizliyi və ya məhdud fəaliyyət qabiliyyəti məhkəmə tərəfindən təsdiq edilmiş, tibbi rəyə əsasən fiziki və əqli pozuntularına görə prokuror, prokurorluğun müstəntiqi və ya əməliyyatçısı vəzifələrini yerinə yetirməyə qadir olmayan şəxslər; 

· alkoqolizm, narkomaniya, toksikomaniya və digər ağır xəstəliklərə tutulmuş şəxslər (bu barədə həkim rəyi olduqda);

· əvvəllər məhkum olmuş, habelə bəraətverici əsaslar olmadan barəsində cinayət işinin icraatına xitam verilmiş şəxslər;

· əvvəllər yol verdiyi kobud nöqsanlara və ya prokuror, prokurorluğun müstəntiqi və ya əməliyyatçısı adı ilə bir araya sığmayan hərəkətlərinə görə vəzifədən azad edilmiş şəxslər; 

· qanunla müəyyən olunmuş müddətli həqiqi hərbi xidmət keçməmiş (qanuni əsaslarla müddətli həqiqi hərbi xidmətə çağırışdan möhlət hüququ olanlar və ya müddətli həqiqi hərbi xidmətə çağırışdan azad edilənlər istisna olmaqla) çağırış yaşlı vətəndaşlar

İşə qəbul prosesi üçün hansı sənədlər lazımdır?

Qanunvericiliklə müəyyən olunmuş tələblərə cavab verən namizədlər müvafiq formada ərizə ilə müraciət edərək müsabiqənin ilkin mərhələsi olan test imtahanında iştirak edə bilərlər Qeydiyyat zamanı şəxsi məlumatlar, təhsil sənədləri və digər zəruri məlumatlar sistemə yüklənir. Zəruri sənədlər aşağıdakılardır:

1. Ərizə- Baş Prokurorluğun portalında təqdim olunan nümunəyə uyğun ərizə forması kompüterdə doldurulmalı, çap olunmalı və imzalanmalıdır.

2. Kadrlar uçotunun şəxsi vərəqəsi- Baş Prokurorluğun saytında verilmiş blank tam doldurulmalı, çap edilməli və imzalanmalıdır.

3. Tərcümeyi-hal- Elektron formada doldurularaq imzalanmış tərcümeyi-hal.

4. Şəxsiyyət vəsiqəsinin surəti- Ön və arxa tərəfi birlikdə skan olunmalıdır.

5. Ali təhsil haqqında diplom- Hüquqşünaslıq və ya beynəlxalq hüquq ixtisası üzrə diplomun skanı. Xaricdə təhsil almış namizədlər Azərbaycan Respublikasında tanınma şəhadətnaməsini də əlavə etməlidirlər.

6. Diploma əlavə- Diplomun qiymətləri və kreditləri əks etdirən əlavəsi.

7. Fotoşəkil-4x6 sm ölçüdə, ağ fonda, rəngli və JPG formatında çəkilmiş 1 ədəd foto.

Qeyd edək ki, bütün sənədlər sistemə müvafiq bölmələrə uyğun olaraq yüklənməlidir. Məlumatlar yalnız bir dəfə təsdiqlənə bilər. Ona görə də bütün sənədlər təsdiqləməzdən əvvəl diqqətlə yoxlanılmalıdır.

Müsabiqə aşağıdakı mərhələlərdən ibarətdir:

Test imtahanı – namizədin hüquqi biliklərinin ilkin qiymətləndirilməsi.

• İmtahan Dövlət İmtahan Mərkəzinin iştirakı ilə keçirilir.

• Normativ hüquqi aktlara əsaslanan suallar tətbiq olunur.

• Namizədlər 70 və daha artıq bal topladıqda yazılı imtahana buraxılırlar.

• Vaxtı və yeri Baş Prokurorluğun rəsmi saytında və KİV-də ayrıca elan edilir

  
  

Yazılı İmtahan və Müsahibə

• Test mərhələsini keçənlər yazılı imtahanda iştirak edirlər.

• Yazılı mərhələdən uğurla keçənlər müsahibəyə dəvət olunur.

• Müsahibədə şəxsi keyfiyyətlər, etik dəyərlər, psixoloji hazırlıq və hüquqi dünyagörüş qiymətləndirilir.

• Xarici dil bilikləri üstünlük kimi nəzərə alınır.

  
  

Müsabiqədən uğurla keçmiş şəxslər Baş Prokurorluğun Elm-Tədris Mərkəzində təlimə cəlb olunurlar. Təlimi müvəffəqiyyətlə başa vuranlar 6 aylıq stajorluğa, daha sonra isə 3 aylıq sınaq müddətinə buraxılırlar